عودة احمد سعد لطليقته

في حوار تاني مع عمرو أديب بعد الانفصال برضه، أحمد سعد اعترف إن 
أحلى أيام حياته كانت أيام جوازه من علياء بسيوني، ووصفها بأنها ست عظيمة، أعظم حاجة في الدنيا، وإنها قدمته لقدام، وميقدرش ينكر دا، وواضح إنه كان مفتقدها في حياته فقال خلال الحوار إن كلمات أغنية "عليكي عيون" كلها كانت ليها رغم انفصالهم، ودا بيوضح قد إيه كان مفتقد وجودها في حياته.

علياء بسيوني هي الزوجة الرابعة لأحمد سعد، وهو قال في حواره مع محمود سعد إنه مش ناوي يتجوز تاني بعدها، لكن من يومين، أحمد سعد أعلن عودته لعلياء بسيوني، وقال إنه رجع لها علشان عارف إن الحياة بيها أحسن وهي كمان عارفة إن الحياة بيا أحسن، قال كمان إن مهما كان فيه بينا خناقات أو غلط وقت نرفزة لازم ندي لبعض فرصة جديدة علشان  على الأقل بنتنا تحس إننا عملنا اللي علينا.

من وجهة نظرنا فيه سببين للانفصال في الحالات اللي زي أحمد سعد وعلياء بسيوني.. إن الزوجة اللي كانت سبب في نجاح زوجها بتفكره بدا كل شوية حتى لو وهو معترف بجميلها ودورها فبيخلق عنده بعد شوية نوع من التحدي إنه ممكن ينجح من غيرها، أو إن هو شخصيا بعد النجاح اللي اتحقق بيكون عايز يثبت لنفسه وللناس اللي بتتكلم عن دورها في حياته، إنه قادر يكمل نجاح عادي من غيرها.. في الحالتين طرق التفكير دي بتودي للانفصال، بين اي اتنين شركاء، مش بس المتجوزين.
ربنا يسعد أحمد سعد وعلياء بسيوني.. ويارب يكونوا أخدوا درس من تجربة الانفصال، ويقدروا يكملوا مع بعض رحلة النجاح في الشغل والحياة، ويفرحهم ببنتهم