عودة احمد سعد لطليقته

ناس كتير كانت واخدة بالها إن الطفرة اللي حصلت في نجومية أحمد سعد، والتغيير الكبير اللي حصل في حياته، بدأ بعد جوازه من علياء بسيوني، وهو نفسه اعترف بكدا في أكتر من برنامج، ووصفها بعد انفصالهم أغسطس 2023، إنها أعظم قوة في حياته وهي اللي عملت كل التغيير اللي حصل في حياته، وقال إن إن الست هي المحرك الرئيسي والأساسي للراجل، فلو الراجل عظيم يبقى الست كانت دافع، ولو الراجل فاشل يبقى الست سبب في اللي وصل له.. طب لو راجل معترف وممتن للست اللي اتجوزها بالشكل دا ليه ينفصل عنها؟

أحمد سعد بيحكي في حواره مع محمود سعد، إن علياء ست لا تكل ولا تمل، ولما تكون شايفة حاجة صح عندها قدرة مهولة على الزن، لحد ما تحقق الهدف، وبيأكد إنه في الأول كان بيقولها "أنا عارف شغلي كويس وعارف بعمل إيه وسيبيني أنا اللي هقرر"، لكنها مكانتش بتيأس وعندها صبر مهول، وأنا كان عندي ميزة إني لما بلاقي نفسي في حتة وحشة بختار الشخص اللي اتسند عليه واسلم له دماغي، فكنت سايب علياء تعمل وتقرر كل حاجة في الشغل وشفت نتيجة كلامها ونجاحنا سوا، لكن اللي حصل إن النجاح كبر أوي والشغل بقى كتير أوي وهي حبت الشغل معايا، فابتدى الشغل ياخد من حياتنا الأسرية.

أحمد سعد بيقول إنه جاهد عشان حياتهم الشخصية تكون أحسن، ولو كان أناني كان كمل في الجواز لأنه كان هو الوحيد المستفيد. 
كان واضح افتقاد أحمد سعد لعلياء بسيوني بعد الانفصال، على كل المستويات (الشغل والاختيارات والنجاح)، أحمد سعد اللي الناس فجأة انبهرت بنجاحه وبإنه كل شوية بيقدم جديد وكل أغنية بيعملها أنجح من التانية مبقاش بنفس المستوى، وبقى عايش على النجاح اللي حققه في فترة جوازه من علياء بسيوني، ودا بيأكد إنه فعلا كان مسلمها دماغه زي ما قال مع محمود سعد.